高登 CEO 林祖舜公開向一眾手機 App 用家致歉!

香港最高流量的討論區「香港高登」早前因為停止授權第3方 App HKG+ 繼續提供服務,令大量 iPhone 高登用戶深表不滿,由停止授權的消息公佈後,被高調批評其作風,然而當 HKG+ 正式停止服務的一天,以 HKG+ 的程式碼為藍本的 LiHKG App 正式推出,數天之內仍保持在香港 App Store No.1 位置,而 Android 版也成隨後成為 No.1 Google Play 免費 App。

大量「高登仔」離開香港高登,改到 LiHKG,而受到多方面指責的高登 CEO 林祖舜一直沒有正式向讀者致歉,更指近日高登 Pageview 沒有明顯下降,仍停在一天約 600 萬 Pageview 的水平。今晚,林祖舜突然在高登刊出公開信,向用戶表示「討論區使用體驗上未能與時並進」,忽略了一班手機 App 用家,在此向一眾手機 App 用家致深切歉意。



hkg-will-stop-app-service-due-to-terminated-authorization_00a

原文如下:

接手高登CEO至今已經有八年,一開始知道要代表高登出席唔同場合,都擔心會俾人起底,但最後決定豁出去以真面目示人。記得上任唔夠一年,就遇到高登歷年o黎最嚴重o既事件 — — 被告誹謗。最初我以為對方只係「嚇o下大家」,殊不知官司一打就打o左五年,最後打到上終審法院至告一段落。當時所受o既壓力大到難以形容,幸好得到好多會員o既支持,甚至有會員自發希望o係財政上給予支持,至今我仍然非常感激。不過,就呢單訴訟我o地花費o左超過7位數字o既律師費同賠償,換o黎法律上清晰釐定討論區要為會員發言負上o既責任。

除o左經常要處理關於誹謗問題o既律師信,高登最常要面對o既就係網絡攻擊問題。其實我o地一直有為伺服器作軟硬件上o既更新,奈何網絡攻擊o既「攻勢」日益增強同頻密,唔少時候大家鬧緊我o地Server超慢,背後其實都係因為伺服器受緊唔同程度o既攻擊,唔單只程式員要用大部分時間o黎處理相關問題,我自己有時都要半夜起身,甚至身處外地時都要處理。面對呢o的攻擊,我覺得冇可能每次都同大家講,否則有o的敏感時間每日要出十次八次公告,大家可能睇到麻木。

其實早年外界對高登有好大誤解,傳媒每每提到高登,差不多一定會同「網絡欺凌」、「閃卡」同「粗口」扯上關係,我覺得既然自己出得o黎見人,不如以高登CEO o既身份向外界宣傳大家o係本地創意文化o既貢獻。雖然初期因為經常出席公開場合影相而被改圖,但近幾年外界對高登o既感覺大有改善,一直以o黎大家o既努力總算冇白費。

以上種種,我希望維持到一個畀大家可以暢所欲言o既討論區,但卻忽略o左最根本o既問題,討論區o係使用體驗上未能與時並進,忽略o左一班手機App用家,在此我希望可以向一眾手機App用家致深切歉意。

因為自己並非「高登仔」,之前一直沿用前管理人對所有事實或非事實o既指控都唔回應o既作風,認為同大家保持一定o既距離,避免言論偏幫任何一方,令處事更加中立。不過呢種諗法已經過時,未能接收到大家o既諗法,做出最合大家心意o既決定。所以我決定以後同高登討論區相關o既重大決定,都會先發帖諮詢各會員o既意見。

近日我已經請程式員加快改善兩個手機App及Mobile版網頁表現,盡快推出新版本,方便習慣用手機上高登o既朋友使用。往後我o地將會就各人o既意見不斷進行修改,請大家到時畀多o的意見我o地。最後我想再向一眾會員再次致歉,感謝各位一直以o黎對我o地o既支持。

相關連線

遲了就沒有!Black Friday 產品優惠一覽(不斷更新)!

限免已完結?不想錯過重大限免應用,可下載《限時情報王》 App 或以 Telegram 追蹤 NewMobilelife 頻道